НОВИ САД – Рух горякох Нового Саду и того викенду 26. и 27. септембра орґанизує єшеньски Новосадски пияц квеца опрез Спенса.
Орґанизаторе порихтали интересантни змисти за нащивительох. Буду орґанизовани презентациї и розгварки зоз фаховцами и продукователями на тему о реґенеративней польопривреди, а наймладши годни участвовац у едукативно-креативних роботньох.
У рамикох Новосадского пияцу квеца будзе и акция черанки старого паперу за саднїци, хтору реализую Инженєре защити животного штредку. Роботни час єшеньского Новосадского пияцу квеца: пияток од 8 до 19 годзин и соботу од 8 годзин до пополадня.
Плановани термини отримованя Новосадского пияцу квеца у октобру: 3-4. октобра, 10-11. октобра, 17-18. октобра, 24-25. октобра.
Новосадски пияци квеца потримал Покраїнски секретарият за польопривреду, водопривреду и лєсарство.