НОВИ САД – У штернастим тогорочним чишлє новинох „Руске слово” у рубрики Тижньовнїк зазначена нащива предсидателя Републики Сербиї Александра Вучича кулскей општини у предвиберанковей кампанї, а на Наших местох обявени прелиминарни резултати локалних виберанкох у Кули.
Попри тим, ту и информациї о упису до першей класи основней школи у Руским Керестуре и Коцуре, напис о вежби за огньогасцох у Златиборским округу керестурских огньогасцох, як и о медзиокружним змаганю „Триолица” котре отримане у дюрдьовскей школи.
Економия пише о одховйованю курчатох у Шидзе, ровнаню дильовох у Дюрдьове и о продукциї шпарґлох Славици Русковски у Коцуре.
Култура и просвита зазначела красни резултати наших рецитаторох. Ту и текст о сотруднїцтве керестурскей и штреднєй школи зоз Вису у Горватскей и нащиви керестурских штредньошколцох у Сиверней Македониї. Ту и звит зоз концерта Центра тамбуровей култури у Дюрдьове и Школи за основне музичне образованє у Кули, як и о Дню отворених дзверох на Русинистики.
У рубрики Людзе, роки, живот представена учителька Тамара Штранґар зоз Руского Керестура, а на Дружтве дзевяте предлуженє фельтону о трох ювилейох рускей ґимназиї.
На бокох рубрики Духовни живот обявена розгварка зоз владиком кир Георгийом Джуджаром з нагоди 25-рочнїци пошвецаня за владику, пише и як ше вирни у Руским Керестуре пририхтую за Вельку ноц, а ту и вистка же парохиянє у Новим Вербаше сами обиля церкву.
На Спорту зазначени резултати наших фодбалских клубох у своїх першенствених лиґох, а ту и резултати змаганя „3 на 3” у рамикох Спортских бавискох „Яша Баков” у Дюрдьове.
У рубрики Горуци тепши на двох бокох понукнути рецепти наших традицийних вельконоцних єдлох.
Як додатки вишли Мозаїк и Дикица.