Михеон Хун Кан

05 MIHEONМИХЕОН ХУН-КАН народзени 9. новембра 1943. року у Дюрдьове од родичох Мирона и Гайналки Канюхових. До державних кнїжкох уписали му мено Мирон, у народу руским и вири униятскей.

Школовали го же би бул як и шицки людзе, же би так думал, робел и жил, алє у таємних кнїжкох Господнїх шицко иншак записане було.

Ище як хлапец указовал шицки знаки же є окрем швета у котрим ше судьбово нашол. У школи бул одлични ученїк, а у живоце обща напасц. Бил моцнєйших од себе, а щицел слабших, бежал од дому до швета, а о його нєсташносцох цали кнїжки би ше могли написац.

После студийох на Природно-математичним факултету у Новим Садзе менял рижни роботи и писал вшелїячину же би забавел и себе и читачох. А вец ше указало же до того нєнароком записал и свою будучносц и, мож повесц, пророцки предвидзел велї збуваня у швеце у котрим жил, а и после нього.

Як окреме нємирни дух почал експериментовац з медитацию и з того периоду остали даскельо кнїжки до котрих записал же „Руснаци детонатор МЕНТАЛ-психо бомби котра перше експлодира у сербскей духовносци, потим залапи цали словянски духовни арсенал и имплодирує до себе шицки народи цалей Планети”. За чудо, то ше уж з добрей мири и зисцело.

Як свой особни експеримент прилапел мено Михеон ХУН-КАН як духовну матрицу Найвекшого освойовача шветох, часох, просторох и существох.

Мено Михеон вжал од архангела Михеона – Войсководителя Божих ангелох же би владал зоз шицкима сознанями УниверзУМ-а.

Мено ХУН вжал од Хунского вожда Атили наволаного “Батог Божи” же би му слова як Батог Божи без милосци патрафели дзе утнуц сцел.

А мено КАН вжал од ДжинґисКана, найвекшого освойовача шветох и народох, же би зоз своїм наученьом освоєл цали Швет.

Знова за чудо, и тот експеримент ше удал понад каждого очекованя.