По словох Ивици Дачича, всоботу на Сайме у Новим Садзе, польопривреда то єдини конар нашей привреди хтори нє заказал анї у найчежших часох. Тиж, розвой медзинародного сотруднїцтва у тей обласци ма вельке значенє, окреме на реґионалним уровню.
У своєй бешеди, предсидатель покраїнскей Влади Иґор Мирович наглашел же, дзекуюци доброму сотруднїцтву медзи републичнима и покраїнским институциями, пририхтани значни мири потримовки, окреме младим польопривреднїком.
На Сайме продукти и услуги зоз 60 жемох представели 1 500 викладаче. Нащивительох очекує богата Вистава польопривредней механїзациї, Национална вистава статку и Вистава орґанскей продукциї. Медзинародни дїловни стретнуца оможлївюю сотруднїцтво поднїмательох и институцийох з розличних концох швета. У Конґресним центру орґанизовани промоциї, презентациї, фахово сходи и други дїловни подїї.
Од новших змистох, то аукция статку. Вєдно з найвекшу Националну виставу статку на Балкану, учашнїки достали нагоду понукнуц и купиц найквалитетнєйши гарла домашнїх польопривреднїкох. Того року ше отримує и 1. медзинародни саям идейох, иновацийох и пренаходкох.
Жем партнер манифестациї, на тот завод, Босна и Герцеґовина.
Присутни викладаче з Австриї, Албаниї, Белґиї, Болгарскей, Чарней Гори, Ческей, Греческей, Французкей, Голандиї, Горватскей, Италиї, Израїлу, Китаю, Летониї, Мадярскей, Македониї, Нємецкей, Польскей, Румуниї, Словениї, Шпаниї, Турскей, України, як и Зєдинєних Арабских Емиратох, а дзешец жеми свою привреду представяю на колективних виставох.
Польопривреднїки на тей манифестациї могли поднєсц и вимогу за купованє нового трактора, моцносци до 100 киловати, а интересованє за тоту поволанку, обявену початком априла, було барз вельке.
През шицки днї отримує ше дїловни и фахово стретнуца, преподаваня и презентациї.
Нащивителє Сайма маю нагоду достац даєден дарунок хтори пририхтани у сотруднїцтве з викладачами, а главна награда то трактор „Беларус 82,1”, хтори кошта 20 500 еври и дарує го „Аґропанонка”.
Капури Новосадкого сайма отворени од 13. до 19. мая, од 9 до 19 годзин, а цена уходнїци 600 динари. Уходнїца за колективни нащиви 400 динари, док за пензионерох, дзеци од 7 до 12 роки, школярох и студентох котри Саям нащивя колективно, кошта 200 динари.
АТРАКЦИЇ
Гоч жиєме скромно, заш лєм вельку увагу прицагую найдрагши польопривредни машини на Сайме, а того року найдрагши трактор то Фендт 1050, хтори кошта 350 000 евра.
Источасно, трима ше же то и наймоцнєйши трактор на швеце – ма 517 коньски сили, шейсццилиндрови МАН мотор роботного волумену 12,4 литри зоз турбополнячом вариябилней ґеометриї.
Интересантна и найвекша животиня, буяк Кокан хтори ма 1 980 кили, Ненада Николича з валалу Батинац при Чуприї, хтори по власнїкових словох „барз миролюбива и умилна животиня”. Його початна предайна цена на аукциї 4 500 еври.
