ВОЙВОДИНА – Понеже почина сезона пирсканя у овоцнїкох и на польох, здруженя пчоларох поволую польопривредних продуковательох же би нє пирскали древка хтори квитню, а ґу тому, пчолом чкодзи и попирскана трава, польске квеце, як и други култури на полю. Пчоларе спозорюю же пирсканє овоци под час квитнуца нє дава резултати, а знїщує пчоли, хтори опрашую овоц.
Древка хтори пчоли опраша маю од 30 до 80 одсто векшу родносц – яблука можу мац до 38 одсто вецей плоди, ягоди 55 одсто, шлївки за 72, а малини аж за 80 одсто вецей плоди.
Закон о средствох за защиту рошлїнох забранює пирсканє рошлїносц под час квитнуца зоз средствами хтори чкодлїви за пчоли. Кед пирсканє спричинї тровенє пчолох, польопривреднїк пчоларови ма плациц до 30 000 динари по кошнїци.
Кара за пирсканє з инсектицидами под час квитнуца од 35 000 до 50 000 динари за физичну особу, за поднїмательох од 300 000 до 500 000, а за правни лїца од 500 000 до милион динари.
Пчоларе оценюю же нє ришенє кари и надополнєнє чкоди, алє же найзначнєйше порозуменє польопривреднїкох и пчоларох.
