РУСКИ КЕРЕСТУР/КУЛА – У Руским Керестуре штварток, 23. марца, у осемдзешатим року живота умарла Гелена Пап (народзена Чакан), просвитна роботнїца у пензиї, алє у тедишнї час и позната едукаторка о здравстве и сучасним живоце у обисцу и фамелиї нє лєм школярох, алє и одроснутих людзох на валалє, окреме женох, коавторка и дакеди познатей и хасновитей кнїжки „Поради у обисцу”.
Гелена Папова народзена 20. септембра 1937. року у Руским Керестуре, а после законченя Висшей хемийней школи и ґаздовства у Земуну, початком 1950-тих рокох перше робела як воспитачка у керестурскей оводи, а 1. септембра 1957. року почала робиц у ОШ „Петро Кузмяк”.
У керестурскей Школи наставнїца Папова, як ю з окремним почитованьом волали и паметаю велї ґенерациї керестурских школярох, и вообще Керестурци, перше робела як учителька, а потим як наставнїца хемиї и предмету Ґаздовство. Два роки, 1986. и 1987. була и помоцнїца директора за основну школу и з того роботного места пошла до пензиї 30. септембра 1987. року, а свою роботу окончовала добре, совисно и вше змирено.
Праве на Ґаздовству тедишнї школяре преглїбели знаня и достали перши поради о сучасних условийох живота у обисцу, здравстве и ґиґиєни, справованю, о здравей поживи, пририхтованю єдлох, о чуваню и конзервованю поживи, алє и о чуваню животного штредку. Єй школяре зазначовали успихи и на змаганьох зоз хемиї, та так єй тедишнї школяр Звонимир Сакач освоєл перше место на Союзним школским змаганю з хемиї, як найлєпши у цалей Югославиї.
Спомнуте 60-их и 70-их рокох преношела и Керестурцом рижних ґенерацийох на преподаваньох, спозорйовала и на старанє о животним штредку, закладала ше за ожелєньованє, та так була медзи иницияторами, потим частвовала и у садзеню топольох у нєшка познатим лєшику коло беґелю у Керестуре, а була и коавторка кнїжки „Поради у обисцу”.
„Поради у обисцу” 1965. року обявело „Руске слово” и то була кнїжка хтору теди мало можебуц кажде руске обисце у наших местох, а хасновита є и нєшка, понеже у нєй на найприкладнєйши и конкретни способ ґаздиньом и другим дати совити и толкованя о рижних потребних роботох у доме, обисцу, кухнї, вообще у фамелиї.
Гелена Папова спомнуту кнїжку написала вєдно з Єлену Солонарову и Ирину Ротову, а у тим им вельо помогол и Микола Скубан. Тиж так, Папова була и главни рецензент „Сучасней рускей кухарки”, хтору „Руске слово” видало 1987. року, а хтора вироятно тиж єдна з найхаснованших кнїжкох у нашим народзе.
За собу зохабела тройо дзеци, медзи нїма и двоме просвитни роботнїки, и шесцеро унучата, медзи нїма и з докторску дисертацию з хемиї, а векшина активни и у руским явним и литературним живоце.
Гелена Папова похована вчера, 24. марца у Кули, дзе жила остатнї роки.