ВЕРБАС – Вчера, 23. марца, на руским теметове у Вербаше отримана панахида о. Дюрови Биндасови з нагоди 140-рочнїци його народзеня. Панахиду служел старовербаски парох о. Алексий Гудак, а присуствовали члени Биндасовей фамелиї, почитователє живота и дїла о. Биндаса и члени КПД „Карпати”. Означованє рочнїци народзеня священїка и руского културного предняка орґанизовало Дружтво за руски язик, литературу и културу и його Секция у Вербаше, а секретар Дружтва Ирина Папуґа гварела же то єден зоз значнєйших датумох у календаре рочнїцох Дружтва за 2017. рок.
– Мило нам же напрямки хтори дал о. Дюра Биндас як найглавнєйши задатки унєшени до роботи Дружтва за руски язик, литературу и културу, хтори ше и нєшка витворює, з чим Дружтво и програмски нашлїднїк тих закладаньох. Нєшка лєм перша з програмох хтори того року будземе орґанизовац на чесц о. Биндаса – гварела Папуґова.
На сходзе наявене же ше о два мешаци планує видаванє зборнїку обявених и нєобявених роботох о. Дюру Биндаса, алє и його приватних документох, хтори зазберує и архивує його унук, новинар у пензиї Михайло Биндас.
О. Дюра Биндас народзени 23. марца 1877. року у Руским Керестуре, а як священїк службовал у Сошицох, Жумберку, Руским Керестуре, Дюрдьове, Коцуре и Вербаше, дзе є и поховани 24. януара 1950. року. Окрем душпастирскей роботи, окремни шлїд зохабел у култури и просвити Руснацох на тих просторох, а бул и инициятор снованя Руского народного просвитного дружтва.