НОВИ САД – У Руским културним центру (РКЦ) у Новим Садзе вчера отримани музични вечар под назву „Акустика Рутеника”.
По словох орґанизаторох, тота манифестация би требала младим приблїжиц руску музику, та учашнїком дата нагода же би обробели познати стари руски народни и забавни шпиванки на свой способ – нови, сучасни и иншаки.
Вечар отворели Саня Дивлякович и Александра Живкович Бучко спред РКЦ, зоз виставу инспировану з улїчну уметносцу, чийо авторе Станислав Мудрох и Любиша Стевич, а водителє вечара, Лидия Костелник и Андрей Орос, привитали нащивительох.
Участвовали млади музичаре зоз вецей наших местох, и як солисти, и як ґрупи, а после змагательней часци прейґ видео-биму пущани споти шпиванкох Руснацох зоз Сербиї, Словацкей, України и Польскей.
Фахови жири, у чиїм составе були Татяна Колєсар Ґвоїч, Мирко Преґун и Александра Колбас, на концу преглашел и побиднїкох. Награду за найлєпши перформанс достала ґрупа у чиїм составе Кристина Афич, Жарко Остоїч, Михаїл Римар и Павле Рац, награду за найкреативнєйши наступ достали Славко Колошняї и Мирко Пап, а награду публики достала ґрупа 2 SH ‘N’ JAY, у чиїм составе Єлена Ґудураш, Александар Човс и Милан Брекайло.
Вчера вечар новосадска Матка була полна, а публика позитивно прилапела и зоз моцнима аплаузами потримала шицки стари – нови руски шпиванки.
„Акустика Рутеника” реализована як проєкт младих зоз РКЦ-а, зоз потримовку Роботного цела за младеж Националного совиту Руснацох.