ВЕРБАС – На вчерайшей схадзки Скупштини општини (СО) Вербас принєшена одлука о преставаню постояня и о утаргованю видавателя Явного подприємства (ЯП) за информованє „Вербас”.
Така одлука принєшена на основи Закону о явним информованю и медийох, Уредби о преносу капиталу без надополнєня занятим, Статуту Општини Вербас, як и Заключеня Аґенциї за приватизацию Републики Сербиї о претаргованю поступку приватизациї, хторе до того подприємства сцигло 12. октобра.
З тоту одлуку загашени Радио „Вербас” и ТВ „Бачка”, а права и обовязки, одвичательносц и власносц Подприємства пребера Општина Вербас, тиж и його документацию и архиву.
На схадзки СО Весна Роґанович розришена з функциї окончователя длужносци директора спомнутого подприємства, як и члени Надпатраюцого одбору ЯП за информованє „Вербас”.
ЯП за информованє, односно його Радио „Вербас” (мал и реґионалну дозволу) и ТВ „Бачка”, информовали на сербским, руским, мадярским и українским язику, а робело од конца децембра 1991. року. Радио „Вербас” самостойно робел од 1975., а ТВ „Бачка” була основана 2003. року.
