Ище єдна премиєра у нашим националним театру

автор сен
712 Опатрене

РУСКИ КЕРЕСТУР – Нащивителє котри всоботу, 20. фебруара були патриц премиєру представи „Цо видзела послуга” у режиї Владимира Надя Ачима, а у продукциї Руского народного театру (РНТ) „Петро Ризнич Дядя”, мали нагоду одпатриц прави „бал под масками”. На основи тексту Джона Ортона, режисер приповедку присподобел нашому менталитету и вєдно з ґлумцами направел комедию ситуациї засновану на замени идентитетох.

Одлични ґлумци з динамику, гумором, интриґами, заменьованьом улогох и костимох у представи, хтора тирва вецей як 100 минути, цали час тримали повагу публики у преполней сали патрачох рускокерестурского Дому култури, котрей аж на концу одкрити нєзвичайни розплєт и порученє.

З нагоди премиєри режисер окреме похвалєл пошвеценосц ґлумецкей екипи, хтору творя Славко Орос, Снежана Малацко, Михайло Варґа, Емил Няради, Ненад Канюх и Ребека Планчак.

Орґанизатор представи Сашо Палєнкаш, суфлер и реквизитер Таня Арва Планчак, костимоґраф Таня Орос, майстор шветла Желько Пашо, майстор звука Владимир Бесерменї, сценоґрафию виробели Звонко Олеар и Дюра Хома, а сценски роботнїки були Златко Русковски и Дюра Хома.

Витворенє того 25. проєкту РНТ „Петро Ризнич Дядя” финансовал Национални совит Руснацох.

ПОВЯЗАНИ ТЕКСТИ