МИКЛОШЕВЦИ – У Миклошевцох того року урожаї сої и слунечнїку були досц добри, бо сої було коло 20, а слунечнїку коло 22 метери по гольту, гварел за Рутенпрес Владо Д. Сабадош, котри обрабя коло 80 гольти жеми, своєй и под аренду. Медзитим, з одкупну цену, окреме сої, анї єден продукователь нє бул задовольни.
Кукурица у миклошевским хотаре тиж барз добре зродзела, коло 70 метери сухого зарна по гольту, алє єст и парастох котри шпоровали з укладанями, та им урожаї и преполовени.
Як гварел Сабадош, кукурицу ше лупа такой на полю и предава, а ламе ше лєм тельо кельо треба за покарму швиньом и живини.
У миклошевским хотаре того року було вельо дижджу, та жем влажна и нє мож ю порихтац за шатву жита, та як гваря парасти, од хвилї завиши кельо жита будзе пошате тей єшенї.
Як за Рутенпрес констатовал (шейдзешатрочни) Сабадош, у Миклошевцох уж нєт вельо польопривреднїкох и векшина то старши особи. Млади векшином пошли робиц до иножемства, так же младших парастох єст барз мало.