ВЕРБАС – Министерство нукашнїх дїлох стреду, 21. октобра, у Вербаше орґанизовало трибину з назву „Безпечносц гражданох”, на хторей о защити особох и маєтку гражданох, як и о мирох хтори полиция пребера за звекшанє бвезпечносци бешедовали министер нукашнїх дїлох Небойша Стефанович, директор полициї Милорад Вельович, началнїки службох у МУП Зоран Алимпич и Владимир Ребич, подпредсидатель Народней скупштини РС Иґор Бечич, та предсидатель Општини Вербас Братислав Кажич.
Министер Стефанович з тей нагоди гварел и же нови закон о полициї, хтори тераз оценює Европска комисия, допринєше же би сербска полиция була ефикаснєйша, професийнєйша и способнєйша служба у найлєпшим интересу гражданох.
– Гражданом потребни чесни и одвичательни полицай, котри озбильни и сце робиц, же би шицких котри потупели закони послал до гарешту – гварел медзи иншим министер Стефанович на трибини у Вербаше.
Подпредсидатель Народней скупштини Иґор Бечич визначел же институциї держави отворени за шицких гражданох и же ше гражданє вербаскей општини чувствую безпечно.
– Децентрализованє локалней безпечносци значи же за безпечносц, попри полициї и тужительства, задлужени и локални заєднїци – гварел Бечич, наглашуюци же у напряме векшей безпечносци, Општина Вербас основала Совит за безпечносц у транспорту и Одбор за безпечносц.