СЕРБИЯ – За польопривреднїкох абсолутно нєприлаплїве длугорочне видаванє державней жеми правним особом, на основи инвестицийних планох, цо медзи иншим предвидзене у тексту нарису вименкох и дополнєньох закона о польопривредней жеми, гварене на вчерайшей схадзки Асоцияциї польопривреднїкох.
Вони ше процивя и длугорочному видаваню, лєбо предаваню жеми странцом и заключую же ношитель розвою треба же би було мале, фамелийне ґаздовство, а нє правна особа, преноши РТВ.
Асоцияция предклада предаванє жеми хтора нє предмет реституциї и то 200 тисячи гектари гевтим польопривреднїком котри жию и робя у месце дзе ше жем находзи, з тим же треба увесц огранїченє на 20 гектарох по ґаздовству.
Сход отримани у Суботици, а на нїм присуствовал и городоначалнїк Єне Маґлаи, котри потримал становиска польопривреднїкох. Вон виявел же жем то ресурс хтори треба же би остал у власнїцтве гевтих котри там жию.
– Нє допущиме же би тот закон охабел неґативни пошлїдки на нашу заєднїцу и наших польопривредних продуковательох, а окреме на малих и штреднїх продуковательох – гварел Маґлаи.