РУСКИ КЕРЕСТУР – У предлуженю полицийней акциї „Армаґедон”, припаднїки Министерства нукашнїх дїлох, у сотруднїцтве з Окремним тужительством за борбу процив високотехнолоґийного криминалу, загарештовали два особи на двох локацийох – у Руским Керестуре и Беоґрадзе, под сумню же ше на тих локацийох окончує виновни дїла у вязи зоз сексуалним злохаснованьом дзецох и малолїтних особох на интернету.
У рамикох акциї загарештовани и затримани И.Х. (37) з Руского Керестура и Н.Б. (39) з Беоґраду, пре сумню же окончели винове дїло приказованя, набавяня и пошедованя порноґрафского материялу и злохаснованя малолїтних особох за порноґрафию, сообщело вчера Министерство нукашнїх дїлох, а пренєсли портал mojnovisad.com и РТВ.
Спомнутих ше терхує же прешли роки, та по гарештованє, прейґ интернет-мрежи пренаходзели и черали авдио-визуални материяли хтори настали зоз сексуалним злохаснованьом дзецох и малолїтних особох.
Под час претресаня квартельох котри загарештовани хасную, пренайдзене вельке количество материялу вязаного за сексуалне злохаснованє дзецох и малолїтних особох на интернету, як и рахункарска опрема хтора служела за набавянє и черанку такого материялу.
З виновнима приявами, загарештовани у законским терминє буду приведзени до Окремного тужительства за борбу процив високотехнолоґийного криминалу у Беоґрадзе, сообщело вчера Министерство нукашнїх дїлох.