Руска библиотека богатша за дзевец нови кнїжки

автор апа  фото вев
1k Опатрене

БЕОҐРАД – Вчера, 27. октобра, на 61. Медзинародним сайме кнїжкох у Беоґрадзе свойо найновши кнїжки представела наша Новинско-видавательна установа „Руске слово“.

За вецей як 70 роки од кеди постої Установа видати вецей як 500 кнїжки, хторим тераз додаваме ище 9 нови, гварела на представяню директорка „Руского слова” Мартица Тамаш, надпоминаюци же су богато опремени и сучасно илустровани, та можебуц прето буду прицагуюци и младшим любительом писаного слова.

На Сайме у Беоґрадзе наша видавательна хижа представела кнїжку поезиї „Безсони ланцущок” Славици Шовш, социоґрафию „Мадярска Горнїца” Мирона Жироша, „На крижней драги” (о Руснацох у Югославиї од 1918. по 1941. рок) др Янка Рамача, „Сучасна українска драма” Людмили Попович и Надїї Мирошниченко, „Славянски язик” др Любомира Белея, три кнїжки за дзеци – „Гайзибан на шпарґу” Меланиї Римар, „Злагода” Серафини Макаї, у пририхтованю (будзе видата тих дньох) „Котульки и ґомбульки” Ирини Гарди Ковачевич, та кнїжку есейох Миколу Шанти „Шантовки”.

О нових кнїжкох на Сайме у Беоґрадзе бешедовали їх дзепоєдни авторе и рецензенти, а на промоциї присуствовали и студенти и мастеранти Оддзелєня за русинистику Филозофского факултету у Новим Садзе.

Шицки нови кнїжки у виданю „Руского слова”, медзи нїма и того року скорей обявена „Капка ми ружа до ока” Звонимира Нярадия, на Медзинародним сайме у Беоґрадзе виложени и на штанду Покраїнского секретарияту за образованє, предписаня, управу и национални меншини-национални заєднїци АП Войводини.

ПОВЯЗАНИ ТЕКСТИ