КОЦУР – Упис до першей класи у коцурскей ОШ „Братство-єдинство” почал нєпоштредно пред Вельку ноцу по юлиянским календаре, а того року буду уписани 59-еро першокласнїки.
– Кажди дзень по штверо-пецеро дзеци приходза ґу педаґоґови на розгварку. Того року наставу на сербским язику буду слухац штерацец дзевецеро школяре у двох оддзелєньох, а до оддзелєня з наставу по руски буду ходзиц дзешецеро школяре – виявела о.д. директора Славица Байор.
Коцурска Школа понука и факултативне виучованє руского, мадярского и ромского язика, а анкети за тото опредзельованє родичом першокласнїкох подзелєни при упису, док старши школяре анкети за шлїдуюци наставни рок буду попольньовац у маю.
Факултативне виучованє руского язика досц заступене, мадярского у меншей мири, док ше за ромски язик прешлого року нє приявел анї єден школяр.