АПОСТОЛСКИ ЕҐЗАРХАТ – Пред найвекшим християнским шветом, Христовим воскресеньом – Вельку ноцу (по юлиянским календаре), Рутенпрес у цалосци преноши Вельконоцну винчованку апостолского еґзарха за грекокатолїкох у Сербиї, владики Георгия Джуджара:
– Христос воскрес – воистину воскрес! З тим радосним привитом Церква Христова поволує нас шицких на радосц у вири же нам Исус з тоту побиду одкрил драгу до спашеня и отворел райски дзвери. Христово Воскресенє – то основа нашей вири до живота вичного и до нашого особного воскресеня! То и наша „Пасха” („Песах”) – преход з рабства до обецаней жеми, преход зоз шмерци до живота! З кресценьом ше кажди чловек облєка и укаламює до Исуса Христа и, зєдинююци ше з його вибраним народом, вєдно з нїм путує до Обецаней жеми!
– Син Божи пришол на швет, вжал людске цело и постал єден з нас – други Адам, котрого грих нє залапел и нє зранєл. Єдино го раня нашо одбиваня його любови и шицки нашо увреди, котри Исус, у чежких церпеньох, остаточно прибива на криж, победзує шмерц з воскресеньом и нам дарує живот вични.
– Исусова шмерц на жеми – то нє конєц живота, алє преход зоз шмерци до полноти живота, до котрей Исус уведол и цали людски род. Заш лєм, иснує велька розлика у шмерци тих котри веря до Христа, и тих котри нє веря. Хто вери до Христа зоз живу, активну и дїлотворну любову, тот нє умера, алє преходзи до нового живота, воскресує. А хто нє вери, и нє жиє по Заповидох Божих и Заповидох любови, тот осудзени на вичносц у цмоти и на живот звонка Божей любови. Святи апостол Павло ясно гутори: „Ви, котри поховани з нїм у кресценю, з нїм сце и воскресли по вири до дїлотворносци Бога котри го воскреснул з мертвих” (Кол. 2, 12).
– Сучасни швет зна буц дзекеди пребарз оддалєни од Христовей науки и часто спонукує християнох на погришни опредзелєня, на нєморалносц, на животни драги котри оддалюю од цилю пре котри Исус церпел и Воскреснул. Алє вира до Воскресеня Исуса Христа одкрива нам радосни смисел тей подиї за нас, уводзи нас до чуда Пасхи, до особного преходу през шмерц до живота вичного, котри ше дарує каждому хто шлїдзи Исуса Христа.
– На таки способ Христос постава наша Пасха, уособена Пасха каждого вирнїка: „Кажди хто жиє и вери до мнє, нє умре навики” (Йо. 11, 26). Така вира приноши каждому спашенє од шмерци, бо водзи ґу вири до Троєдиного Бога, помага у сотрудзованю з Божима ласками прейсц животну драгу з Божим благословом, даруюци нам моци на тей чежкей драги.
– Прето ше и радуєме Христовому Воскресеню, радуєме ше же зме Христово, бо знаме же шицко тото цо за нас найчежше у тим жемским живоце – церпенє и шмерц, победзуєме вєдно з Нїм. Його побида – то ґаранция нашей побиди. Треба ше лєм облєчиц до Ньго, зруцуюци зоз себе „старого чловека з його грихами”! Теди зме зоз своїм животом и чистим шерцом годни ясно шведочиц радосц нашого одкупеня у припаданю Христовому Воскресеню!
– Радуйме ше прето и вешельме, бо Воскреснути уключел нас шицких до того спасительного плану и на нїкого нє забул! Най радосц Христового Воскресеня войдзе до каждого людского шерца же бизме могли жиц з Нїм и у Нїм! У тих нєлєгких часох служме єдни другим з нашима духовнима дарами и материялнима добрами, бо то правдиве шведоченє вири до Христового Воскресеня!
– У тих радосних и святих дньох Христового Воскресеня привитуєм шицких з радосним християнским привитом: „Христос воскрес! Воистину воскрес!”
+ Георгий, Ваш владика