РУСКИ КЕРЕСТУР – Зоз шветочну програму, Основна школа „Петро Кузмяк“ вчера випровадзела своїх малих матурантох. Од 56 школярох, пецеро вуковци, а ище 33-йо достали окремни награди за посцигнути успихи на рижних змаганьох. За школярку ґенерациї на програми преглашена Антония Монар.
Окрем Монаровей, Вуково дипломи достали Жарко Остоїч, Александра Русковски, Михаела Еделински и Йована Ноґавица. Наградзеним школяром дипломи уручела директорка Школи Хелена Пашо Павлович, у присустве їх класних старшинох Мариї Балїнт и Михайла Хому.
Пригодну интересантну програму у преполней Велькей сали Дому култури пририхтали школяре седмих класох ОШ.
По програми маломатуранти у Школи мали маломатурски вечар.
