НОВИ САД – У Руским културним центру, Нови Сад (Йована Суботича 8), штварток, 15. децембра отримана виберанкова Скупштина Дружтва за руски язик, литературу и културу.
На Дньовим шоре було осем точки, а схадзку Скупштини отворелa Ирина Папуґа. Вона привитала присутних и пречитала писане овласценє др Юлияна Рамача, предсидателя Скупштини, хтори нє бул у можлївосци присуствовац.
После вибору роботних целох розпатрени и прилапени Записнїки зоз першей схадзки Скупштини, отриманей 14.12.2018. и другей хтора була 6.12.2019. року, зоз надпомнуцом же пре епидемию корона вирусу 2020. и 2021. року нє отримани схадзки Скупштини. Потим конституована и Скупштина Дружтва, так єдногласно за предсидателя Скупштини вибрани др Юлиян Рамач, а за предсидательку Управного одбору Блажена Хома Цветкович.
Розпатрени звити о роботи Дружтва за 2020, 2021 и 2022. рок, и у розгварки члени Скупштини надпомли же робота Дружтва була обсяжна и одвивала ше спрам предвидзених програмних активносцох и финансийних можлївосцох, а прилапени и финансийни звити за 2020. и 2021. рок, як и програма роботи за наступни 2023. рок.
У другей часци було слова о виданьох Дружтва у 2020–2022. рок: Зборнїк роботох „Studia Ruthenicа” числа 26, 27 и 28; Соня Папуґа, „Думки ми лєца / Мисли ми лете” (2020); Блажена Хома Цветкович „Язични аларм” (2021); Ирина Папуґа „Русинска гиманзија / Руска ґимназия” (2022). Прикладнїки виданьох подзелєни присутним членом Скупштини.
