РУСКИ КЕРЕСТУР – Руски Керестур вчера рано забилєл перши шнїг тей жими, нападало до коло 15 центиметри, а шнїг з витром падал и вноци.
Гоч би тей жими нє мало обовязку чисциц керестурски улїци од шнїгу, алє, як дознава Рутенпрес, на уровню кулскей општини шнїг ма розгартац єдно червинске подприємство вибране на тендеру прейґ ЯП „Завод за бивудов” Кула, месне Явне комуналне подприємство „Руском” вчера од коло 13 до 18 годзин очисцело шнїг по валалских улїцох, а вец знова од 20 до 23 годзин вноци, так же драги були преходни.
„Руском” шнїг по керестурских улїцох чисци з розгартачом на камиону Добродзечного одньогасного дружтва, та з розгартачами на двох тракторох, а очисцени и центер валалу, автобуска станїца, каплїчка, простори опрез явних установох, паркинґи. Ґу тому, „Руском” очисцел и драгу до Крущичу, а понеже ше стара о комуналийох у тим месце, з трактором Крущичанох, а зоз средствох „Рускому”, очисцени и улїци у тим сушедним месце.
Вчера з меншу машину шнїг одруцовани и з дражкох у центре Керестура, цо будзе предлужене и нєшка дополадня, а плановане и руцанє солї и ризли.
Главна, маґистрална драга Кула-Оджак вчера була преходна за транспорт, а отримую ю векши явно-транспортни подприємства.
