РУСКИ КЕРЕСТУР – Школяре напряму Туристични технїчар Штреднєй школи Петро Кузмяк з Руского Керестура, тих дньох ше пририхтую за штварту Еразмус плус фахову праксу у иножемстве.
Дванац школяре другого и трецого року спомнутого напряму рихтаю ше за фахове усовершованє хторе будзе тирвац два тижнї, ґу тому здобуду и богате животне и професийне искуство, нови познанства, як и можлївосц упознац другу културу.
Фахова пракса будзе реализована у остатнїх двох тижньох у маю, у Платамонасу у Греческей.
Проєкт подполно финансовала Европска уния през Еразмус плус програму за котру керестурска школа ма два акредитациї – за фахове и за обще образованє.