КОЦУР – У рамикох XXXIV Спортских бавискох „Яша Баков” внєдзелю, 25. мая, у Коцуре на Пелетовим салашу було отримане змаганє у вареню пасулї.
На змаганє ше приявели дзевец екипи зоз вецей наших местох – два екипи зоз Коцура, екипа з Вербасу, два зоз Дюрдьова, єдна з Руского Керестура, два екипи з Нового Саду и екипа з Петровцох.
Найлєпше уварена пасуля була у екипи Искра 2 зоз Коцура, котрей у вареню помагали и госци зоз Будимпешти. Друге место завжала екипа СД Русин з Руского Керестура, а треци були кухаре зоз Папивинґ ДОО з Вербасу.
Комисию за оценьованє пасулї и тогорочного змаганя творели по єден член зоз каждей екипи, а цале змаганє прешло у друженю и добрей атмосфери. Хвиля була красна и слунечна, а природа и желєнїдло вєдно творели прекрасни дзень прикрашени з пахом вареней пасулї з котлїкох котри ше ширел по салашу.
Орґанизаторе на концу подзековали шицким котри участвовали, як и тим котри помогли и спонзоровали тото змаганє.
