ЖАБЕЛЬ – Вчера, 6. октобра, у голу ОШ „Милош Црнянски” у Жаблю зоз Шветочну академию и додзельованьом наградох преславени Дзень Општини Жабель и Дзень ошлєбодзеня у Першей шветовей войни, як и два рочнїци – 160-рочнїца народзеня др Лази Пачуа и 110-рочнїца народзеня др Йована Туцакова, обидвох з Чуроґу.
Програму отворел Хор „Пасторала” зоз Жаблю з гимну Републики Сербиї, а потим присутним бешедовал предсидатель Општини Жабель Чедомир Божич.
Попри гражданох, одборнїкох и представительох Општини, на преслави були и подпредсидатель Покраїнскей влади Мирослав Васин, заменїк покраїнского секретара за медзиреґионалне сотруднїцтво и локалну самоуправу Душко Радакович, заменїк городоначалїнїка Мостару Салем Бубало и предсидатель Општини Донї Вакуф Гусо Сушич, з Босни и Герцеґовини, директор Покраїнскей канцелариї за инклузию Ромох Душко Йованович, дюрдьовски парох о. Йоаким Холошняй, як и православни сященїки з општини.
Медзи госцами була и позната ґлумица Мира Баняц, котра з рецитациями участвовала у шветочней програми.
На шветочнсоци уручени и награди з нагоди Дня општини – Митрово награди достали Мария Дакич зоз Жаблю и Даниєла Рандєлович з Чуроґу за посцигнути резулатати у култури и уметносци, Владимир Дюрдєвич з Чуроґу за резултати у обарзованю и Драґани Апич зоз Жаблю и Набойша Тохоль з Дюрдьова за посцигнути резултати у спорту.
Митрово грамоти достали Андрей Стефан Чулум зоз Жаблю з обласци образованя, Светозар Тепич з Ґосподїнцох за донаторство и гуману роботу и др Милан Трновац з Чуроґу з обласци задравства.
Подзекованя достали Ґоран Салонски з Ґосподїнцох за добри резултати у польопривреди, Оґнєн Боґданович, Петро Бандел, Марко Ґвозденац и Марко Маркович зоз Штреднєй школи „22. Октобер” зоз Жаблю за участвованє у квизу „Кельо ше познаме” и Наташа Павлович зоз Жаблю з обласци образованя, Бранислав Вуйков з Чуроґу и Дружтво за очуванє народней култури и традициї „Дєрдан” з Ґосподїнцох з обласци култури и уметносци, Ґоран Берич з Дюрдьова за добредзечну огньогасну роботу, Здруженє „Пензионер” зоз Жаблю за дружтвену роботу и Фодбалски клуб „Єдинство” з Ґосподїнцох з обласци спорту.
У рамикох означованя Дня општини, на ютре на 10,15 годзин на памятнїк учашнїком у Першей шветовей войни у центре Жаблю будзе положени венєц.
