РУСКИ КЕРЕСТУР – Комисия за воду Еколоґийного руху „Желєни персцень” з Руского Керестура вчера, у преширеним составе, отримала схадзку з представителями подприємства „ҐМ ватер” з Нового Саду, хторе ше занїма з пречисцованьом и третманом води, а чия технолоґия применєна у фабрики води у Сенти. Под час прешлотижньовей нащиви керестурскей делеґациї фабрики води у Сенти, тота технолоґия оценєта як вигодна за ришованє проблему з воду у Керестуре.
На вчерайшу схадзку бул поволани и иноватор др Мирослав Бесерменї зоз Сримскей Митровици, котри обдумал еколоґийне построєнє за пречисцованє води без хаснованя хемийних средствох и представел го присутним.
Свойо начални ришеня за керестурски проблем з воду на вчерайшим сходзе представели директор того подприємства дипл. инж. технолоґиї Милорад Ґолубович и мр Зоран Чирович и превагло опредзелєнє за їх технолоґию, понеже є уж витворена у велїх подприємствох, док за иновативну технолоґию др Бесерменя у нашей держави ище нєт порозуменя, гоч є наградзована у иножемстве. Як поведзене на вчерайшей схадзки, на ню Керестурци рахую у дальших фазох ришованя проблему з нєисправну воду за пице.
Представителє подприємства „ҐМ ватер” ше обовязали же цо скорей виробя свойо конкретне понукнуце з предрахунками – и за фабрику и за цену води хтору би вона продуковала, а з домашнїма нащивели и студнї за керестурски водовод дзе би, по їх оценох, могла буц змесцена будуца фабрика води.
