ДЮРДЬОВ – Дзецинска драмска секция КУД „Тарас Шевченко” з Дюрдьовa всоботу, 4. априла, у просторийох Дружтва премиєрно виведла дзецинску драмску сличку „Дурнїло”.
Млади ґлумци, возросту основней школи, пред полну салу патрачох интерпретовали приповедку хтору з кнїжки приповедкох „Воденїчка на стриберним потоку” Мирона Будинския адаптовал и режирал Яким Чапко, а по драматизациї Якима Олеяра. Розбавени ґлумци на бини приказали Дурнїлову схопносц и знаходлївосц, посилаюци красну поруку младим, котри ше з публики уключовали до розплєту представи.
После поклону, шицки члени Дзецинскей драмскей секциї пред патрачами подзековали режисерови Чапкови на красним друженю на пробох и подаровали му плакату тей представи з подписами шицких учашнїкох, як и пригодни дарунок на здогадованє.
У представели ґлумя Иван Хромиш, Борис Хромиш, Єлена Горняк, Владимир Горняк, Єлена Мудри, Иван Кухар, Иван Скубан, Иґор Салаґ, Милца Мигальовски и Мария Горняк. Суфлер Тамара Чордаш, инспициєнт и костимоґраф Наташа Ч. Хромиш, за сценоґрафию бул задлужени Мирослав Чакан, за музика и звучни ефекти Даря Хромиш, а за шветло Мирослав Шарик.
После премиєри у Дюрдьове, млади ґлумци з тоту представу буду участвовац на тогорочним Драмским мемориялє у Руским Керестуре.
