ДЮРДЬОВ – У 3. колу Подручней фодбалскей лиґи Нови Сад, хторе одбавене 4. септембра, фодбалере ФК Бачка 1923 зоз Дюрдьова страцели у стретнуцу зоз фодбалерами Футоґа, з резултатом 1:2.
Стретнуце нє було нательо чежке за госцох. Максимално ше закладали за кажду лабду на шицких часцох терена и бавели анґажовано и нападацки, а то дало плод. Перши ґол на стретнуцу бул за Футоґ, у 34. минути.
У другим полчаше було досц нагоди же би фодбалере Бачки дали ґол, алє яґод же им щесце обрацело хрибет. Госцом ше удало же би дали свой други ґол у 74. минути. Теди уж могло нагаднуц побиднїка того стретнуца. Пред сам конєц стретнуца, у 86. минути, Душан Тривунович копнул до лабди и зменшал розлику на 1:2.
И на тим стретнуцу було досц жовти картони пре нєспортске справоване.
После того кола Бачка спадла на пияте место зоз шейсц бодами. Уж наютре дюрдьовских фодбалерох дочекаю фодбалере зоз Будисави.