ПРЕШОВ (СЛОВАЦКА) – Здруженє русинских писательох Словацкей, на схадзки отриманей 15. децембра на Институ за русински язик и културу Универзитета у Прешову, отримало схадзку и преглашело резултати зоз 12. Литературного конкурсу Мариї Мальцовскей, преноши радио ЛЕМ.фм.
Скорей як преглашени найуспишнєйши учашнїки на конкурсу Здруженє русинских писательох Словацкей отримало схадзку на хторей предсидателька Кветослава Копорова поинформовала же Здруженє 2025. року реализовало штири проєкти: обявена кнїжка Мирослава Жолобанича Коцурик з Тополи, и збирка поезиї Миколая Коневала З русиньского сердця 3. Ґу тому орґанизация отримовани и розвивани официйни веб бок и орґанизовани 12. Литературни конкурс Мариї Малцовскей. Слова було и о плану активносцох у 2026. року. На схадзки ше члени здогадли и же ше у тим року упокоєли двойо члени Здруженя – Василь Ябур и Теодозия Латова. Тиж и же двойо члени преславели свойо ювилеї – Владислав Сивий 65 роки, и Ивета Мелничакова означела 60. родзени дзень. Копорова ище гварела же орґанизация ма 28 члени и пейц кандидатох за членство, а то углавним млади людзе.
Як пише на ЛЕМ.фм Кветослава Копорова превжала функцию предсидательки писательох 2010. године од русинского писателя Николая Ксенякова и на тей функциї место три, як теди думала, остала петнац роки. За нового предсидателя номиновани Михал Павлич, хтори заняти у Институту за русински язик и културу Универзитета у Прешову, ґу тому вон ше занїма зоз русинску литературу и член є орґанизациї. На мандат од три роки вибрани и нови состав Совиту Дружтва, Комисиї за ревизию и контролу.
Ушлїдзело шветочне преглашенє резултатох Литературного конкурсу Мариї Мальцовскей на хторим фахови жири у составе Кветослава Копорова, Михал Павлич и Ивана Сливкова оценєли роботи дзешец авторох хтори ше приявели на 12. Литературни конкурс Мариї Малцовскей.
На конкурсу участвовали: Ана Реґрутова, два млади авторки Ана Замутовска и Леа Васкова, а представени и Мелания Германова, Миколай Коневал, Елена Хомова-Гриньова, Людмила Шандалова, Мария Шмайдова, Милан Ґай и Владислав Сивий. Кажде дїло пречитане, а пречитани и фахово критики, хтори написала членїца жирия Ивана Сливкова, вона фахово и обєктивно оценєла поетски и прозни твори хтори сцигли на конкурс.
Жири одлучел же на Литературним конкурсу Мариї Мальцовскей треце место завжал Милан Ґай, хтори приявел духовну поезию, тиж треце место завжал и Владислав Сивий, хтори ше на конкурсу представел зоз гумористичну прозу. Друге место додзелєне за прозу Ани Замутовскей. Перше место припадло други рок зашором, Леи Васковей, хтора ше приявела зоз поезию, обявел ЛЕМ.фм.