Даяна Гаргаї и єй супруг Боян под час пандемиї одлучели уложиц капитал, знанє и енерґию до розвою погосцительного обєкта на Ченею, хтори нєшка успишни приклад фамелийного бизнису.
Пандемия вируса корона 2020. року застановела швет, затресла тарґовища и велїх людзох нагнала превипитац власни професийни и животни вибори. Док єдни чекали же ше живот враци до старих коляйох, други кризу видзели як простор за пременки. Медзи нїма були Даяна и єй супруг Боян, нєшка власнїки вили Вико на Ченею, погосцительного обєкту хтори за даскельо роки постал глєдана дестинация за свадзби и преслави, нє лєм у Сербиї, алє и вельо ширше.
Даяна пред тим була занята у фамелийней фирми хтора ше занїмала з продукцию цивох и плехох, Боян у адвокатури длугши час, так же їх роботи нє указовали на нову, иншаку роботу до хторей би ше могли лапиц. На концу ше, заш лєм, указало же тото цо кончели, було барз добри фундаменти за нову обласц – погосцительство.
Року 2020. док пандемия бовчала, Даяна и Боян пошли до Горватскей, дзе мали хижу за одпочивок. Пре епидемию, алє и прето же ше Даяна пошвидко мала породзиц, одпочивок предлужели. Вше кед мали шлєбодного часу, обиходзели винариї од шибенского и задарского краю, аж по Истру.
– Теди якош настала идея же бизме могли мац цошка свойо, дзе бизме повязали простор, природу и людзох – памета Даяна. Нє була то лєм романтична задумка, алє початок озбильней и обдуманей инвестициї хтора би длугорочно мала смисла.
И праве теди, по врацаню з одпочивку, дознали же ше на Ченею предава маєток, им интересантни. Нє одлучели прейґ ноци, алє анї длуго нє оклєвали. Опатрали зароснути будинок, локацию, роздумовали о укладаньох, потенциялу тарґовища… и на концу обєкт купели. И ту почина їх поднїмательска приповедка.
Будованє и потримовка фамелиї
По Даянових словох, нє могло то прейсц без велькей потримовки фамелиї у каждим смислу, алє анї без приятельох хтори такой пришли, так як ше дакеди ходзело на мольбу, и почали керчиц маєток и ушорйовац го.
– Робота нє була лєгка и Боян ми раз гварел же тих своїх приятельох, цо нам спочатку барз помагали, нє шмеме вецей поволац, бо ше вельо наробели… А робота у дружтве якош лєгчейше идзе, и наисце им дзекуєме. Було ту вельо роботи, майстрове одходзели и приходзели, а нам ше удало познєйше постояци обєкти и добудовац. Простор зме плански ушорйовали, и на концу зме надумали же вилу будземе видавац зоз комплетну услугу – гвари Даяна, хтора пред тим як ше вошло до спомнутей роботи народзела сина Виктора, по хторей вила достала мено – Вила Вико. Символика ту, паралелно з приходом нового живота, народзел ше и нови дїловни проєкт.
Даяна зохабела фамелийну фирму и превжала орґанизацию, мала искуства з економиї и туризма, алє их надополнєла з озбильнима курсами у тей обласци и превжала оперативну часц роботи. Боян ма искуства у правних процедурох, до позно вноци вичитовал контракти, односно, кончел шицко цо ма вязи з администрацию хтора часто зна буц озбильне препреченє новим инвеститором. И праве тота розличносц у комплементарних знаньох обидвоїх була їх предносц.
А вец Гарґайово купели ище єдну хижу при маєтку, преширели капацитети, ушорели двор, посадзели древка, з єдним словом – виплановали кажди куцик. Правда, ище на самим початку кед лєм розпатрали тот маєток, пачело ше им тото же на нїм було вельо желєнїдла, же такой при обєкту мали, такволани, лєс, ушорели и базен и то була, гваря, єдна велька предносц.
– Ґаражи зме претворели до апартманох, и наисце ше укладало до инфраструктури – каменьче, бехатон, дражки и дражочки…, шицко зме робели з єдним цильом, а то мац простор хтори нам оможлїви отримац тоту дїялносц – гвари Даяна.
Початок з роботу и перши госци
Даяна ше швидко виборела за тото же би видавали вилу у хторей анґажовани роботнїки, келнере, заградкар и два жени хтори були стаємно заняти, на хтори ше у каждей хвильки могло опрец – гварела Гаргайова. Вше, як гвари, требало и попораїц и дочекац госцох, а заинтересованим поуказовац цали обєкт.
Перша свадзба була у маю 2022. року и прешла без проблемох. Бул то добри и моцни сиґнал же концепт добре задумани.
Нєшка, три роки познєйше, вила Вико професийно орґанизовани погосцительни обєкт. У вили було на початку 80 места, потим є преширена на 300 особи, а свадзби ше уж тераз заказує за 2027. рок. Цени од 90 до 115 евра по особи, завиши хто яки пакет услугох вибере. У маєтку ше нє вари, то Даяна кончи з преверенима фирмами. Професийни манаджмент ясно дефиновал стандарди у роботи и праве тот економски баланс медзи квалитетом, ценами и капацитетом вилу Вико позиционовал же би була конкурентни реномованим обєктом у Беоґрадзе и Суботици.
Приповедка Даяни и Бояна Гаргайових указує же успих у поднїмательстве нє случайни, алє є резултат єдней роздуманей одлуки порихтаносци на ризик, алє и фамелийней помоци и потримовки. Було бешеди и о тим же кед ше им задумка нє уда, могло би там крашнє жиц, бо такей красоти надалєко нєт.
Вила Вико нєшка нє лєм место за преслави, алє є приклад як ше криза може претвориц до дїловного моделу, правда, з озбильну роботу и кед ше ма сцерпеня. Указало ше и тото же знанє, контрола трошкох и длугорочне планованє ключни фактор успиху, та аж и у таких секторох за хтори ше трима же су ризични.
Гаргайово задовольни, маю добри повратни информациї, найчастейше од їх клиєнтох, млодятох, алє и од госцох хтори там пребували. Ослухую госцох, понукаю квалитет, присподобюю ше ґу новим часом и рахую же тоту приповедку ище єден длугши час нє опуща.
Од идеї по тарґовище
Укладаня у погосцительстве нє приноша швидки заробок. Так и перши роки роботи вили Вико були фокусовани на врацанє инвестициї, вибудов репутациї, алє и нєпреривне ученє, ученє як ше руша тарґовище. Гаргайово за три роки вибудовали єден дїловни модел, хтори барз глєдани и хтори ма ясну економску лоґику.
Нєшка, кед ше термини за вилу заказує и по рок и пол напредок, чи треба дацо додац, доповесц.
