БЕОҐРАД – Министерство польопривреди, лєсарства и водопривреди и Министерство защити животного стредку принєсли Правилнїк о преглашеню зоз ловостойом защицених файтох дзивих животиньох, з цильом отримуюцого хаснованя и защити дзивих животиньох, очуваня биодиверзитету и ровновагного управяня на ловискох у согласносци зоз домашнїма и медзинароднима стандардами.
Зоз новима одредбами уведзени и дочасово мири. Так лови на ярабицу застановени по 14. октобер 2027. року, а на герлїчки до 14. авґуста 2027. року.
Перши пробни лови на дзивого заяца можу почац 15. октобра, алє лєм пре науково виглєдованя и анализи, аж вец годно утвердзиц условия и час кеди годно пойсц на лови, з тим же сезона ловох муши буц закончена по 31. децембер того року.
Зоз тим Правилнїком дополнєна и часц хтора ше одноши на тирванє сезони ловох за шицки файти дзивих животиньох хтори защицени зоз ловостойом. Так поведзме, сезона ловох на єленї тераз тирва по 15. фебруар.
Правилнїк мож опатриц на тим ЛИНКУ.