ДЮРДЬОВ – Преподаванє и представянє Нашеньскей хижи Синдєнта (Syngenta) и Хемийней хижи Адама Сербия отримане вчера, штварток 22. януара у СУР Пицерия Трле МНА.
О вецей сортох нашеня кукурици спред нашеньскей хижи Syngenta, а окреме о гевтих котри вигодни за дюрдьовски хотар, приповедала дипломована инжинєрка аґрономиї польодїлско-заградкарского напряму Мая Андєлич Коїч зоз Жаблю.
Кед слово о валаским хотару, котри остатнї роки ма мало дижджу, та рошлїни церпя вельку горучаву, видвоєла три сорти кукурици. Хибрид Минерва (Minerva) у подлєйших условийох зменшує чутку и так напредує, а у лєпших условийох ше лєпше и ровномирно розвива. Потим хибрид Милестон (Mileston), на тарґовищу од прешлого року и указал ше як витримовни. А хибрид Евидент (Evident) ше указал як найлєпши у вецей катеґорийох на дзевец оглядох у конкуренциї з вецей семенскима хижами у Войводини.
Кед слово о слунечнїку, котри постава заступейши у дюрдьовским хотаре, нашеньска хижа Сидєнта як найвигоднєйши видвоєла два вчасни хибриди Неома (Neoma) и Сумико (Sumiko), котри добри за подлєйшу жем. Од штреднє позних и за лєпшу жем препоручена сорта Амазония (Amazonia) котра добре родзи, як и Бакарди (Bacardi) и Мичиґен (Michigen) котри злєпшана вариянта спомутей сорти слунечнїку Бакарди, котри знова барз подобни як и популарна сорта Конди (Kondi), алє ше ю нє понука того року.
О продуктох Хемийней хижи Адама и о защити урожаю з фокусом на култури котри ше садзи и шеє у дюрдьовским готаре, бешедовала дипломована инжинєрка защити рошлїнох Душица Попович з Нового Саду. Вона гварела же у южнобачкей часци, як и у Дюрдьове пременєна шатвова структура. Вецей ше шеє жито и ярец, а менєй сою, котра була традицийна култура. Пестованє кукурици остало стабилне, з малима осцилациями у одношеню на други часци Войводини. Як найвигоднєйши продукт од хоротох и дзивих травох видвоєла фунґицид Кустодия (Custodia) котри ше добре указал на житу за перши третман, потим Дилер (Diler) котри ше добре указал у знїщованю дзивого цирку, як и Калиф (Kalif) за амброзию котрей остатнї два роки ознова єст на польох.
Преподаванє орґанизовал Аґро Михайловски ДОО зоз Дюрдьова.
