РУСКИ КЕРЕСТУР – Зоз представу за дзеци „Инсталуй и ти дїдов джи пи ти (GPT)” Руского народного театру (РНТ) „Петро Ризнич Дядя”, хтора виведзена вчера у физкултурней сали Школи „Петро Кузмякˮ у Руским Керестуре, закончени тогорочни 57. Драмски мемориял Петра Ризнича Дядї.
Представа витворена по текстох Ирини Гарди Ковачевич и Славка Ороса, у режиї Владмира Надя Ачима, а улогу Дїда ґлумел Емил Няради.
У интерактивней представи, ґлумец Емил Няради на свой автентични гумористични способ, приповеда о дзецинстве на салашу у дїда и баби, а през приповедку дзецом сликовито приблїжує и толкує рижни руски вирази, фрази и присловки, такому возросту вше менєй познати.
Сонґ за представу „Дїдов ҐПТ” за котри текст написал Славко Орос, музику и аранжман Кристина Афич, виведли – Ана Мария Сопка, Доротеа Рамач, Адрияна Штранґар, Корина Будински, Милена Рамач и Лена Зелич.
Представу порихтали и – суфлер и реквизитер Таня Арва Планчак, костими Таня Орос, майстор тона Владимир Бесерминї, майстор шветла Желько Пашо.
