РУСКИ КЕРЕСТУР – З покладаньом венцу на памятнїк погинутим борцом НОВ у центре Руского Керестура вчера, 20. октобра означени Дзень ошлєбодзеня валалу у Другей шветовей войни – 20. октобра 1944. року.
Почесц погинутим борцом присутни дали и з минуту цихосци, а з тей нагоди поведзене же у ошлєбодзеню Югославиї од фашизму, односно у Другей шветовей войни з Керестура участвовали 356 борци, а 53 погинули.
– Тот датум треба паметац прето же є важни, бо пришло до ошлєбодзеня Руского Керестура и других сушедних местох. Керестурски борци участвовали у закончуюцих ошлєбодительних операцийох, а погинути борци дали свой живот за шлєбоду и ошлєбодзенє од нацизму и фашизму под час Другей шветовей войни – гварел на пригодней шветочносци предсидатель Месного одбору Здруженя борцох НОВ Керестура Дюра Папуґа.
Кладзенє венцу орґанизовал Месни одбор Здруженя борцох НОВ у сотруднїцтве з Месну заєднїцу Руски Керестур.
