НОВИ САД – Преподаванє на тему „Йован Хранилович як новинар” нєшка од 11 до 12,30 годзин отрима др Владимир Барович, професор на Оддзелєню за медийни студиї Филозофского факултета у Новим Садзе.
То друга з трох едукацийох, хтори за новинарох и редакторох хтори информую на руским язику, у Заводзе за културу войводянских Руснацох у Новим Садзе орґанизує Новинарска асоцияция Руснацох (НАР).
Преподаванє з роботню на тему „Иновацийох у руским язику, з акцентом на язик у друкованих медийох на руским язику” новинаром и редактором хтори информую на руским язику отримала вчера лекторка у НВУ „Руске слово” Блажена Хома Цветкович.
Вона на преподаваню визначела же ше наш руски язик муши розвивац, алє и же треба чувац и пестовац його автентичносц.
– Жиєме у вику кед ше шицко барз швидко одвива, меня, твори нове и нови поняца уходза до шицких сферох нашого живота, медзитим, и у медийох и у каждодньовей комуникациї вше треба похасновац нашо руски слова, то треба же би нам була основна стратеґия.
Слова з других язикох треба хасновац лєм кед у нашим язику нєт одвитуюца замена – гварела Блажена Хома Цветкович.
Преподаванє на тему „Нєвербална комуникация и политичаре – розодкриванє емоцийох, 30. новембра од 11 до 12,30 годзин у Заводзе отрима шеф Катедри за медийни студиї на Филозофским факултету у Новим Садзе, професор др. Деян Пралица.
Едукацию за новинарох и редакторох у медийох хтори информую на руским язику НАР орґанизує як проєкт хтори прейґ Конкурсу за унапредзенє професийних стандардох потримал Покраїнски секретарият за културу, явне информованє и одношенє з вирскима заєднїцами.