НОВИ САД –У просторийох Руского културного центра у Новим Садзе вовторок, 17. априла, отримана схадзка Скупштини дружтва. На схадзки розпатрани звити о роботи у прешлим року и план за тот рок. Зоз заувагами прилапени и финансийни звит.
На схадзки заключене же, и при шицких почежкосцох у хторих роби новосадски РКЦ, предходни рок бул успишни, а аматере були учашнїки, лєбо орґанизаторе у вецей як трицец манифестацийох. Статистично патрене, у просторийох дружтва и на числених манифестацийох у других местох, члени РКЦ мали три наступи мешачно.
Кед слово о финансийох, на рахунку дружтва з рижних жридлох було коло 2 650 000 динари. На билансним боку розходох було дакус вецей трошки. Кед ше поздава порядни и програмски трошки сума преходзи 3 000 000 динари, так же ше указало же остало нєзакрити трошки од коло 432 000 динари. Найвекши трошок, хтори ше з рока на рок повторює, було зогриванє просторийох, коло 600 000 динари.
Проблем хтори будзе чежше ришиц то же у секцийох за наймладших вше менєй єст дзеци. На схадзки винєшени приклад дзецинскей танєчней секциї хтора нє так давно Дружтво представяла на Покраїнскей смотри дзецинских фолклорних ансамблох зоз петнац танєчнїками, а од початку рока на танєчну секцию за тот возрост приходза лєм двойо.
План роботи РКЦ за тот рок ше уж почало реализовац. Од початку рока отримани вецей як дзешец манифестациї. З оглядом же ище вше нє заварта финансийна конструкция за тот рок, и же ше ище вше нє зна кельо пенєжи будзе у каси, план за тот рок нє конєчни, алє є оптимистични.
