Уж традицийни вечар з нагоди Дня младосци отримани у Руским културним центру (РКЦ) у Новим Садзе пияток, 27. мая, зоз тогорочну тему Дзе(нь) младосц(и)? – „Erothica Ruthenica”, по записох Володимира М. Гнатюка.
Музично-литературни вечар зоз нїтку еротики, отримани у орґанизациї РКЦ з потримовку Роботного цела за младеж Националного совиту Руснацох, з цильом розбиваня предрозсудкох и табуох. Идею и инспирацию за праве таки змист того вечара орґанизаторки у мено РКЦ и модераторки програми, Александра Живкович и Саня Дивлякович, нашли у еротичних записох Володимира Гнатюка.
– Жадали зме ошвижиц змисти хтори уж постоя. Нє видумали зме нїч нове, нє приказали нїч скандалозне лєбо вулґарне, лєм зме сцели приблїжиц и тоту файту уметносци ґу реалносци, дзе и припада, и розбиц табуи. Гнатюково записи часц нашого скарбу, нашей прешлосци и нашей култури. Литература нє подлєйша кед ма елементи еротики, то состойна часц наших животох и треба же бизме були того свидоми – толкує Александра Живкович.
ЕЛЕМЕНТ ЕСТЕТИКИ
Вечар почал зоз отвераньом вистави фотоґрафийох Андреи Новак, хтори авторка направела инспирована з тему вечара – еротику.
– На фотоґрафийох културно представена еротика. Барз сом задовольна як зме сотрудзовали зоз орґанизаторками, зоз реакциями нащивительох на мойо фотоґрафиї, зоз цалу атмосферу. Руснаци доказали же су отворени за таки змисти – гвари Новакова.
У другей часци програми Александра Лендєр приповедала о еротичних записох у рускей литератури, хтори зазберовал Володимир Гнатюк коло 1900. року, а хтори ше, вєдно зоз другима записами, находза у кнїжки „Еротика рутеника”, хтора видата 1995. року у виданю Секциї за скарб Дружтва за руски язик и литературу.
– Мой задаток бул же бим пренєсла часци теориї литератури, алє лєм у гевтей мири же бим указала же еротика нє бридка и нє вулґарна, же нє припада порноґрафиї, алє є елемент естетики хтори нас воздзвигує на исти способ, як и кажда файта уметносци. Думам же ше нам поспишело реализовац тото цо зме задумали – гвари Лендєрова.
Мирослав Малацко пречитал, односно, интерпретовал штири записи зоз кнїжки „Еротика рутеника”.
– Публика барз позитивно прилапела змист програми, зоз овациями, було наисце опущено, без треми и вообще даякей тензиї. Перши руски еротски вечар, напевно, розбил табуи и треба предлужиц отримовац вечари зоз „шлєбоднєйшима” змистами – прешвечени Малацко.
ПЕРШИ РУСКИ КАБАРЕ
Треца часц вечара була пошвецена музичней програми, дзе шпивачки Саня Дивлякович, Александра Колбас и Танита Ходак одшпивали руски „гевти шлєбоднєйши” шпиванки, тоти цо ше, як шпивачки гваря, шпива покрадзме, дзешка у трецей сали, за шанком, уж кед скоро шицки пойду дому, а останю лєм даскельо найвитримовнєйши. Провадзел их оркестер у чиїм составе були Мирослав Пап, Владимир Сивч, Атила Чибри, Мирослав Фейди и Єлена Ґудураш.
– Отримали зме перши руски кабаре. Нє роздумовали зме вельо хто будзе шпивац, длуго ше медзисобно познаме, лоґичне нам було же то будземе праве ми три – гвари Саня и додава же идея вечара була представиц прекрасни руски шпиванки, хтори роками постоя, лєм су скрити, нє бешедує ше о нїх, а шицки их знаю.
– Шицко цо робиме тераз дїйствує на нашу историю. Ми тоти хтори треба же бизме робели, же бизме творели. Кед ше ми нє будземе розвивац и робиц на себе, нє будзе нїхто. Барз ми велька чесц же сом часц тей екипи, того вечара, того збуваня – припознава Колбасова.
– Треба же бизме пренєсли и охабели за собу шицки файти уметносци, нє лєм тото „фине” – додава Танита.
У рамикох вечара була и томбола: треца награда була повязка за очи, друга награда бул пальок, а перша – фотоґрафия по виборе зоз вистави Андреи Новак. Пенєжи зоз томболи наменєни за потримовку за видаванє ЦД-а зоз шпиванками зоз того вечара, а то и друга фаза того проєкта – же би ше направело авдио-запис.
Новосадска Матка була полна, атмосфера була опущена, зоз отворену интеракцию учашнїкох и нащивительох, хтори потримовали програму зоз аплаузами и ошмихами.
Упечатки нащивительох:
Павлина (21 рок, Руски Керестур): Одлично було. Було и поучне, и забавне. Крашнє чуц дацо нове и модерне.
Марияна (19 роки, Ветерник): Супер сом ше препровадзела, найвецей ше ми пачели шпиванки. Даєдни шпиванки сом чула и скорей, даєдни сом тераз першираз чула. Вечар бул барз успишни, а табуи розбити.
Валентина (22 роки, Коцур): Таки змисти напевно хибя при Руснацох и тото прави перши крочай ґу новому и модерному.
Давор (31 рок, Вербас): Вечар бул нєконвенционални, алє у рамикох култури. Треба залапиц шицки аспекти живота, нє лєм тоти хтори ше звичайно промовує у културних програмох.
Мартина (23 роки, Руски Керестур): Вечар у Матки бул окремни, иншаки як шицки потераз. Найвекши упечаток на мнє охабел Мико Малацко, наисце професийно интерпретовал приповедки, супер бул. Уживала сом.
Славко (37 роки, Нови Сад): Пачи ми ше способ на хтори представени наш културни скарб хтори вше бул у нашим народзе. Окреме ми мило же ше тельо вельо людзох позберало, Матка, так повесц, була цесна.