СЕРБИЯ – Нєшка, 21. фебруара Медзинародни дзень мацеринского язика, хтори УНЕСКО пред 15 роками преглашел як здогадованє на шмерц студнтох у Даки, котри погинули у борби за хаснованє мацеринского язика. З прилапйованьом Европскей повелї о реґионалних и меншинских язикох, Сербия ше обовязала же окреме будзе робиц на очуваню албанского, босанского, болгарского, мадярского, ромского, румунского, руского, словацкого, українского и горватсого язика.
Цалосне образованє на мацеринским язику у Сербиї ше одвива на сербским, албанским, босанским, болгарским, мадярским, руским, румунским, словацким и горватским язику, а ище шейсц язики ше виучує у рамикох предмету мацерински язик з елементами националней култури.
Националним меншином ґарантоване и право на информованє на мацеринским язику, хторе у друкованих медийох хасную 14 национални меншини, медзи нїма и Руснаци. У електронских медийох вецей од 80 емитере маю програми на язикох националних меншинох, медзи нїма и по руски.
У Статуту Автономней покраїни (АП) Войводини утвердзене же у роботи орґанох АП Войводини окрем сербского, у службеним хаснованю ище и мадярски, румунски, руски, словацки и горватски язики и писма.
Од початку означованя Медзинародного дня мацеринского язика, УНЕСКО кажди рок тот дзень пошвецує одредзеней теми вязаней за очуванє и промовованє мацеринского язика. Того року то „Инклузивне образованє прейґ язика“.