НОВИ САД – У просторийох Руского културного центру (РКЦ) Нови Сад вчера, 25. фебруара, отримана Рочна скупштина дружтва.
У звиту о роботи за прешли рок виказани добри резултати хтори новосадски аматере зазначовали цали рок – у РКЦ робя 12 секциї, хтори кажди мешац мали даяку активносц, чи манифестацию у своїх просторийох, лєбо були госци у других местох.
Кед слово о финансийох, РКЦ у прешлим року мал на розполаганю менєй як 2 милиони 360 000 динари, а жридла средствох були як и дотераз – з буджету Городу Нови Сад, Покраїнского секретарияту за културу и явне информованє, Покраїнского секретарияту за управу, предписаня и национални меншини-заєднїци, Министерства култури Републики Сербиї, Националного совиту Руснацох, Заводу за културу войводянских Руснацох, як и з дзепоєдних конкурсох и од донаторох.
План програми роботи за тот рок будзе векшином вязани и за означованє ювилю РКЦ – 70-рочнїци постояня, а єдна часц средствох будзе унапрямена и на реновированє просторийох, цо започате прешлого року.
