ОСИЄК – У орґанизациї Городскей и Универзитетскей библиотеки Осиєк, 20. фебруара отримана закончуюца манифестация з нагоди означованя Дня мацеринского язика у Осиєку, з назву „Фестивал язикох”.
Наступели 12 дружтва хтори през писню, рецитацию, драмску сличку, лєбо на иншаки способ представели свой мацерински язик. КУД Руснацох Осиєк ше представело з писню Агнетки Балатинац „Сина Руснака”, хтору рецитовала Мануела Дудаш, та з двома нашима шпиванками – „Желєнєє жито” и „У градочки шалата”, хтори з провадзеньом тамбурового оркестру одшпивал хор КУД Руснацох Осиєку.
Попри тим, на Фестивалє участвовала и Етно-секция Дружтва, хтора на своїм штанду представела традицийни руски єдла, нашо писмо, друковани виданя, колаж о историї Руснацох, як и фотоґрафиї з роботи КУД Руснацох Осиєк.
„Фестивал язикох” нащивели коло 300 особи и упечаток же є з рока на рок на вше висшим квалитативним и орґанизацийним уровню, а вшелїяк, то и барз добра нагода за представянє националних меншинох Осиєку, та и нашей рускей.