СИВЕЦ – По одлуки селектора на Општинскей смотри театралней творчосци у кулскей општини Давида Кецмана Даку, шицки шейсц виведзени представи буду участвовац и на Зонскей смотри, хтора будзе у Червинки.
Так ше на Зонску смотру пласовала представа драмских аматерох з Крущичу, два представи Културного центру Кула, представи аматерох з Червинки и Сивцу и младежска представа Драмского студия „АРТ” Дому култури Руски Керестур „Врацим ше по вашо души” Стивена Кинґа, у режиї Владимира Надя Ачима.
Попри шейсц представох з местох кулскей општини, на Зонскей смотри буду участвовац ище лєм два – з Вербасу и Жаблю.
Селектор одредзел и представу хтора з Општинскей смотри будзе госцовац на тогорочним Драмским мемориялє Петра Ризнича Дядї у Руским Керестуре, а то представа „Живот у цесних ципелох” Душана Ковачевича”, у режиї Ани Илич, драмских аматерох зоз Сивцу.
Општинска смотра у Сивцу тирвала од 21. по 26. марец, кеди селектор сообщел резултати змаганя представох.