ВЕРБАС – Внєдзелю вечар, 27. априла, на бини Културно-просвитного дружтва „Карпати” госцовал Руски народни театер „Петро Ризнич Дядя” зоз театралну представу „Полицає” Славомира Мрожека, хтору за тоту нагоду адаптовал и режирал Янко Лендєр зоз Вербасу.
Пред вербаску публику того вечара на сцени наступели Ребека Планчак, Яким Винаї, Емил Няради, Нада Лендєр, Михайло Бодянец, Андрея Штефанко и Сара Ковач.
Госци, вербаскей публики приказали драму хтора през комедию и апсурд указала цо би ше случело з полицию у дружтве дзе народ послушни и нє проциви ше держави, дзе полиция нє ма кого загарештовац. През спреводзки и на рижни лукави способи шеф полициї пробує створиц державного нєприятеля, же би ше оправдало важносц иснованя полициї.
Текст представи преложела Наташа Ґрунчич, асистенти режиї Славко Орос и Владимир Надь Ачим, суфлер и реквизитер Таня Арва Планчак, костимоґраф Таня Орос, майстор тона Владимир Бесерминї, майстор шветла Желько Пашо, маски виробел Цвиєтин Аничич, а подобово ришеня обезпечела Александра Медєши.
Тексти за сонґи писал Славко Орос, музику Марина Роман и Кристина Афич, аранжмани Златко Русковски, шпивали Марина Роман и Кристина Афич, провадзаци гласи були Марина Роман, Кристина Афич и Дорика Емейди.
Тетарална представа одбавена пред полну салу вербаского КПД „Карпати”, а кажду часц представи присутни провадзели зоз окремну увагу и ґлумцох наградзели зоз гласним аплаузом.
