РУСКИ КЕРЕСТУР – Єден зоз „наймладших” балох, штварти Бал рекреативкох, на хторим були присутни коло 90 жени рижних ґенерацийох, отримани всоботу, 14. фебруара у ресторану „Три круне”.
Попри смачней вечери и доброго розположеня рекреативкох и їх госцинских, орґанизована и богата томбола, так же кажде дацо достал. Награди даровали числени подприємства и приватни поднїмателє зоз валалу та су прето наволани „спонзоре велького шерца”. Главна награда була бициґла, друга телевизор, треца награда була рочна предплата за рекреацию а шицки награди остали у Руским Керестуре.
За найактивнєйшу рекреативку преглашена 76-рочна Мелания Сопка, за найвеселшу рекреативку на балу преглашена дакедишня учителька Ксения Бодянец, а орґанизаторка и тренер Рекреациї за жени Лїляна Еделински достала букет квеца од шицких рекреативкох як подзекованє за витирвалосц и нєсебичне закладанє у орґанизациї балу.
За веселу атмосферу зоз музику бул задлужени керестурски „Касиус бенд“. Вешелє закончене у позних годзинох, а рекреативки уж наявели нове друженє за Дзень женох 8. марца на Лонґове.
