25. МАЙ – На нєшкайши дзень народзел ше Дюра Варґа.
1840 – У Сербиї запровадзени явни поштански транспорт з отвераньом першей пошти у Беоґрадзе. Пошта з Беоґраду до других местох у жеми сциговала стреду и всоботу.
1887 – Народзел ше архитекта Драґиша Брашован (Вершец, 25. май 1887 – Беоґрад, 7. април 1965), проєктовал будинок Дунайскей бановини (нєшка Влада АП Войводини), будинок Главней пошти у Новим Садзе, будинок Стреднєй польопривредней школи у Вершцу, Хижа Дьордя Ґенчича (нєшка Музей Николи Тесли) у Беоґрадзе…
1925 – Народзел ше учитель, новинар, дружтвено-политични и всестрани културни дїяч Дюра Варґа (Дюрдьов, 25. май 1925 – Нови Сад, 25. октобер 2003). Основну школу закончел у Дюрдьове, а нїзшу ґимназию у Новим Садзе, першу класу Учительскей школи закончел у Зомборе, а други три класи у Новим Садзе. Робел як учитель у Дюрдьове, наставнїк у Ґимназиї у Руским Керестуре, а бул и главни и одвичательни редактор и директор новинох и Новинско-видавательного подприємства Руске слово, редактор дзецинского часопису Пионирска заградка и перши редактор часопису Шветлосц. Бул редактор Рускей редакциї Заводу за видаванє учебнїкох Войводини. Осем роки бул секретар Културно-просвитней заєднїци городу Нового Саду. Бул и на велїх других дружтвено-политичних и других функцийох. Писал учебнїки, а позберал и пририхтал за друкованє твори вецей руских писательох. Барз значне доприношенє Дюра Варґа дал и дїялносци Дружтва за руски язик, литературу и културу од початку його иснованя и як його предсидатель. Пензионовал ше 1987. року, упокоєл ше 25. октобра, а поховани є 27. октобра 2003. року у Новим Садзе.
1929 – У Народним театру у Беоґрадзе виведзена премиєра представи Панї министерка Бранислава Нушича. Главну улогу бавела Жанка Стокич, котрей Нушич напредок наменєл улогу.
1945 – Першираз означени Дзень младосци у Югославиї. Дзень младосци було швето у Социялистичней Федеративней Републики Югославиї (СФРЮ), и було повязане зоз родзеним дньом доживотного предсидателя СФРЮ Йосипа Броза Тита же би од 1957. року, на його инициятиву, було наволане Дзень младосци. Главни символ Дня младосци була Штафета младосци, хтору ше ношело по цалей Югославиї так же 25. мая була придата Титови на шветочним слету, на стадиону ЮНА у Беоґрадзе. На дзень Титовей шмерци 4. мая 1980. року, штафета претаргла драгу и стала на його труни. Остатня програма придаваня Штафети младосци отримана 1987. року.
1993 – Совит безпечносци ЗН прилапел резолуцию 827 о снованю Медзинародного суду за войново злодїйства на просторох бувшей Югославиї, зоз шедзиском у Гаґу.