ДЮРДЬОВ – Внєдзелю, 19. марца вчас рано, у Дюрдьове у 86. року живота умар, протоєрей ставрофор о. Йоаким Холошняй, длугорочни дюрдьовски парох, котри на тей длужносци службовал нєполни 46 роки.
О. Йоаким Холошняй народзени 25. януара 1932. року у Руским Керестуре, дзе закончел основну школу, ґимназию у Вербаше, а богословию на Римокатолїцким богословским факултету у Заґребе. За священїка го пошвецел владика Гавриїл Букатко 9. мая 1958. року у Руским Керестуре.
Перше место його священїцкого служеня була управа парохийох Печно, Ґрабар и Прибич у Жумберку од 1958. по 1962. рок, а од 1962. по 1971. рок службовал у Миклошевцох.
За управителя парохиї у Дюрдьове бул меновани 1. октобра 1971. року, а од 1979. року бул и бачки декан.
Од 12. октобра 1983. року о. Холошняй бул член Литурґийней и Будовательней ради Крижевского владичества, за протоєрея сраврофора Святи Римски Пристол меновал го 1985. року, а 1986. постал конзултор, док член Священїцкей ради постал 1988. року.
До Литурґийней и Будовательней ради ище раз бул меновани 1989. року, а кед 1999. року бул основани Владически викарият за Сербию и Чарну Гору (тота державна заєднїца ше волала и Югославия), о. Йоаким Холошняй бул меновани за викара того викарияту, хтори постоял по снованє терашнього Апостолского еґзархату 28. авґуста 2003. року.
Паноцец Йоаким Холошняй барз вельо будовал – у церковней порти у Дюрдьове збудовал пасторални центер з красну салу и другима просториями. Оправял и адаптовал парохийни дом и церкву, на хторей поробени нови верх на турнї, обновена нукашньосц церкви. На теметове у Дюрдьове збудована и стилска каплїца з криптами за хованє, участвовал у вибудови парохийного дому нашей церкви у Ґосподїнцох.
О. Йоаким Холошняй и писал – приповедки, алє и популарно-науково твори, а єден з нїх – „Упознай свой обряд” – роки ше у предлуженьох публикує у християнским часопису „Дзвони”.
Попри тим, о. Йоаким Холошняй останє запаметани и по високих уметнїцких досягох и краси пестованя церковней музичней творчосци и своїм позарядовим шпиваню з прекрасним тенором, а познате же цала його фамелия барз музикална.
Його соло-партия у „Отче наш”, композитора Дубеньского, а у виводзеню Хору „Розанов” – здобула антолоґийне значенє. Участвовал у видаваню трох авдио-касетох з нашу церковну музику, Зборнїку вибраних писньох зоз Саночного, Служби Божей и Парастосу карпаторуского богослужебного розшпиву. Попри зоз свою фамелию, шпивал и у спомнутим Церковним хору „Розанов”, а окрем священїцкей роботи, бул активни и на других подручох, так же мал значну улогу и у снованю „Рускей одлоги” (музейней збирки) у Дюрдьове.
Бул оженєти з Амалию, нар. Микловш, з котру мал седмеро дзеци, а з котрих двоме священїки.
Дюрдьовски парох о. Йоаким Холошняй будзе поховани на ютре, на вовторок, 21. марца, а обряд хованя у дюрдьовскей церкви почнє на 11 годзин.