ДЮРДЬОВ/ҐОСПОДЇНЦИ – У дюрдьовскей Церкви Рождества Персвятей Богородици и ґосподїнскей Церкви святого архангела Михаїла вчера, внєдзелю 31. мая, почало преславйованє церковного швета Русадля.
У церкви служени Служби Божи, а вельку Службу Божу, на перши дзень швета Русадля служел о. Борис Холошняй. По велькей Служби Божей котра у Дюрдьове була на 10 годзин, а у Ґосподїнцох на 8 годзин, служена и Вечурню зоз специялнима молитвами до Духа Святого.
На 15 годзин на грекокатолїцким теметове у Дюрдьове почало пошвецанє надгробних плочох. Пошвецали их о. Борис Холошняй и о. Дамян Кича, ЧСВВ, зоз Кули. Вони двоме потим на 17 годзин, при Крижу служели заєднїцку Панахиду, а потим предлужели пошвецанє. У Ґосподїнох пошвецанє надгробних плочох було всоботу, 30. мая, пошвецал их о. Борис Холошняй котри служел и панахиду.
Вирни у Дюрдьове и Ґосподїнцох тoгo дня оквецели облаки на своїх обисцох, по обичаю зоз желєнима конарчками и рижнофарбовим квецом.
Нєшка, на други дзень Сошествия Свтого Духа, Служба Божа у Дюрдьове будзе узвичаєно на 10 годзин, а на 18 годзин Вечурня. Наютре, на вовторок, 2. юлия на 18 годзин будзе Служба Божа за добру хвилю.
У Церкви святого архангела Михаїла у Ґосподїнцох нєшка, пондзелок 1. юния, Служба Божа будзе на 8 годзин.
