КОЦУР – У Грекокатолїцкей церкви Успения Пресвятей Богородици внєдзелю, 31. мая означене Сошествиє Святого Духа – Русадля.
Вельку Службу Божу служел декан бачки и парох коцурски о. Владислав Рац, а Церковни хор коцурскей грекокатолїцкей церкви, под руководством Александра Планкоша, зоз шпивом прикрашел богослуженє. Нукашньосц церкви була оквицена зоз желєнима конарчками, а и вирни по цалим валалє оквицели облаки на своїх домох зоз желєнима конарчками и квецом, як то и обичай на тот дзень.
На Вельким теметове того дня пополадню о. Рац служел парастос за шицких покойних. У заєднїцкей молитви, шицки парохиянє ше здогадли своїх милих покойних, а парох служел и панахиду на поєдинєчних гробох.
Другого дня Русадльох у грекокатолїцкей церкви будзе и мированє на шицких Службох Божих. Трецого дня того швета Завитни дзень, на 7 годзин рано будзе Завитна Служба Божа зоз обходом коло церкви, а потим коцурски вирни нащивя Марийово святилїще Водицу.
