НОВИ САД – Вчера видруковане юнийско-юлийске, остатнє, число часописа за дзеци „Заградка” у тим школским року, зоз новим дарунком – налїпками инспированима зоз сликовнїцу „Квитки з мамовей заградки”.
Рубрика Пречитали и роздумали понука задаток котри мож ришиц и пред, и после розпусту, а Госци и новосци аж на штирох бокох информую о велїх активносцох школярох.
У рубрики Сцеме знац и упознац зазначени промоциї кнїжки „Воденїчка на стриберним потоку” у школох у Руским Керестуре, Коцуре и Дюрдьове, а ту и напис о тогорочним дзецинским фестивалу „Веселинка”.
У Читальнї представена нова кнїжка авторки Ана-Мариї Рац „Квитки з мамовей заградки”. Ту мож пречитац даскельо писньочки, зоз прекраснима илустрациями Анї Гудак Заґоричник.
Приповедка у сличкох у тим чишлє ше вола „Лилова плата”, написала ю Златка Чизмар, а у Малей заградки єст интересантни задатки за наймладших. Ту и Мала вистава, а такой по тим шлїдза боки зоз авторскима роботами наших школярох.
Як и звичайно, у юнийско-юлийским чишлє обявюєме и наградзени состави на Смотри кирилскей писменосци у Тителю.
Радио у Заградки вас поволує же бисце зазначели даєдни податки зоз нєшкайшей хвильки о себе, а Алексей Колошняї зоз Руского Керестура нас упознава зоз своїм псом Мону.
Нє вихабени анї Забавни боки, а анї Заградкова ґалерия, алє рубрика котру пририхтовал астрофизичар др Роберт Джуджар у тим школским року дочекала свойо остатнє предлуженє.
Шлїдуюце число Заградки видзе у септембру.