НОВИ САД – У Новосадскей синаґоґи всоботу вечар, 30. мая, отримане ревиялне стретнуце новосадских хорох на хторим ше зишли любителє мизики, а окреме хорского шпиваня.
Пред полну Синаґоґу наступели Хор Конкатедралней грекокатолїцкей церкви св. Петра и Павла з Нового Саду, хор Горватского културно-просвитного дружтва ГКПД Єлачич з Петроварадину, поп и еверґрин хор Версе, Хлопска шпивацка ґрупа Фантє, ДС Кредарица Нови Сад, хор Єврейскей општини Нови Сад Хашира и мишани хор ДС Кредарица з Нового Саду.
Публика того вечара пред собу мала богати и рижнородни репертоар, од церковних композицийох и часцох литурґиї византийского обряду прейґ традицийних горватских, словенских и єврейских нумерох по сучасну домашню и странску поп и еверґрин музику.
Полна сала Новосадскей синаґоґи и атмосфера под час концерта потвердзели вельку заинтересованосц публики за хорску музику и таки културни збуваня.
Орґанизатор ревиялного стретнуца було Дружтво Словенцох Кредарица з Нового Саду и маестро Борут Павлич як идейни ношитель того проєкту хтори потримали Єврейска општина Нови Сад, Канцелария Влади Републики Словениї за Словенцох у дияспори и Музична омладина Нового Саду.
