КОЦУР – Школяре оддзелєньох штвартей класи Основней школи Петро Кузмяк з Руского Керестура штварток, 21. мая були на уж традицийним вилєту у Коцуре котри и того року орґанизовал Одбор за образованє Националного совиту Руснацох.
Домашнї зоз Основней школи Братство єдинство були школяре руских оддзелєньох од першей по штварту класу вєдно зоз своїма учительками. Вони их привитали и препровадзели з нїма приємни дзень. З тей нагоди шицки керестурски школяре нащивели Основну школу, Етно клуб Одняте од забуца и Грекокатолїцку церкву Успения Пресвятей Богородици.
Вилєт започали зоз друженьом и ужину у лєтней учальнї и бависком у школским дворе, а потим ше прешейтали през валал и вилєт предлужели у просторийох Етно клубу Одняте од забуца. Там их предсидателька Етно клубу Аранка Медєши и Рада Лазор упознали зоз историю и културу народох котри жию у Коцуре, а школяре поопатрали и рижни експонати котри ту виложени.
После нащиви Етно клубу школяре прешейтали по грекокатолїцку церкву, дзе их привитал декан бачки и парох коцурски о. Владислав Рац. Вон школяром приповедал о историї коцурскей церкви, та на вилєту научели и дацо нове.
На концу друженя ше вєдно врацели до центру валала и ту ше засладзели зоз сладолядом котри бул велька радосц наймладшим. Госци и домашнї ше розишли полни красних упечаткох.
