НОВИ САД – На Фармацеутским факултету у Новим Садзе вчера, 22. мая отримана трибина з котру и формално закончени проєкт „Лїки без бариєрох”.
Присутних привитала деканка Фармацеутского факултету проф. др Наташа Йованович Лєшкович, а руководителька проєкту проф. др Светлана Стойков представела тим людзох котри участвовал у його реализациї. Податки представени на вчерайшей трибини позберани зоз анкети у котрей участвовали 125 особи, и вони ше операю на искуства пациєнтох по наших местох.
Вецей о зазначених резултатох анкети бешедовали др Драґана Стоїлькович и др Никола Йоїч, а як заключенє винєсли податки же 97 одсто анкетовани у своїх обисцох бешедує по руски, а лєм 27 одсто у здравствених установох; 60 одсто випитаних чувствує нєсиґурносц у дохтора, бо нє зна чи добре розумели свойого дохтора лєбо фармацеута и 40 одсто потераз мали даяке нєжадане искуство пре погришне розуменє совитох здравствених професионалцох.
У рамикох проєкта обявени билтен на руским и сербским язику у котрим ше находза основни поради о правилним хаснованю лїкох, а видруковани и постери котри нєодлуга буду полїпени у домох здравя.
На трибини були и представнїки Националного совиту Руснацох, предсидатель Стеван Самочета и предсидатель Одбору за службене хаснованє язика и писма проф. др Михайло Фейса, котри наявел и нови проєкт – фармаколоґийни словнїк на руским, сербским и латинским язику.
Проєкт „Лїки без бариєрох” потримал Покраїнски секретарият за високе образованє и науково-виглєдовацку дїялносц, Национални совит Руснацох и Фармаколоґийни факултет у Новим Садзе.
