НОВИ САД – У Новим Садзе, у Мастер центру Новосадского сайму, всоботу, 5. децембра отримани 16. Науково-фахови сход „Сучасна продукция желєняви”, на хторим були и члени Здруженя продуковательох паприґи „Капсикум анум” з Руского Керестура, котри представели свойо и продукти Здруженя женох „Байка”.
Коло 30 Керестурци на сход пришли орґанизовано, на автобусу, а як гварели члени Зруженя паприґарох Микола Винаї и Владимир Бодянец, сцели вичерац искуства, чуц науково совити, алє и указац свойо продукти, як цо то айвар, мелка паприґа, нашенє парприґи, та дунци зоз жимнїцу и продукти „Байки”.
На отвераню сходу бешедовала подсекретарка Покраїнского секретарияту за польопривреду, водопривреду и лєсарство Наташа Адеми, котра гварела же треба потримовац таки фахово и науково стретнуца.
Медзи фаховима викладачами бул и Владимир Сабадош зоз Зомбора, хтори бешедовал о уплїву защитних мрежох хтори правя цинь на урожай и квалитет паприґи. Вон заключел же таки защитни мрежи можу помогнуц у продукциї желєняви, та треба роздумац и о можлївосцох субвенционованя за их набявянє.
